Pergunta ida ne'e dala barak mosu entre hosi sarani Katólika rasik bainhira tama ba iha salaun igreja, no dalaruma mós simpatizantes barak ou katekúmenu sira (kandidatu baptismu) husu buat ne'e ba sarani Katólika, maibé sira la bele esplika tanba sedauk hatene mós tansá nune'e.
Lós duni iha, Tempu Kuaresma nakfahe tan ba iha tempu-sira be determinadu hodi espesializa liu-tan liturjia ba iha buat ne'ebe hakarak hamoris ho klean liu tan. Semana Kuaresma IV ne'ebe ita foin selebra iha semana liu ba ne'e hanaran Semana Laetare.
Laetare iha lian Tetun ninia signifikadu “haksolok”, períodu ida iha ne'ebe konvida sarani sira hodi haksolok iha momentu ida iha períodu hosi arependimentu nia atu ita simu ispíritu foun ida hodi hasoru Selebrasaun Paskua ne'ebe semana 3 tan ita sei selebra. Iha semana ne'e mak, jeralmente Igreja detém Sakramentu Konfesa no Sakramentu Rekonsiliasaun atu hamoos sarani sira nia pekadu hanesan hamoos-án hodi Selebra Paskua.
Hafoin tiha Semana Kuaresma IV, tama iha Semana Kuaresma V ne'ebe hahú desde Sabádu loraik tuku 18.00 oras lokal. Momentu ne'e mak tama ba Igreja ne'ebe hanaran Períodu Miserável. Iha Sabádu molok Misa Loro-kraik/Adorasaun Loro-kraik Semana Kuaresma V, krus no estatua-sira iha igreja laran taka eh falun ho hena roxu. Ninia signifika sáida lós? Atu krus no estatua-sira nafatin besik bainhira Paskua? Sertamente ida ne'e la'os ninia objetivu.
Krus no estatua-sira be falun hena roxu hodi kria atmosfera lutu ba Kristu nia terus no mate ne'ebe besik ona. Hanesan ema ida ne'ebe uza hena lutu nian, nune'e mós Igreja hafalun ninia-án ho hena lutu nian ne'ebe simboliza ho taka eh falun krus no estatua-sira ho hena roxu.
Iha Períodu Miserável ne'ebe realiza besik to'o Kalan Paskua, Igreja hakarak tama liu laran tan, iha Istória ba Na'i Jezús Nia Terus no lori Ninia-terus. Liturjia koloka tiha fatin hotu hosi simbolu haksolok nian, no aprezenta iha liafuan no asaun, tristeza no arependimentu ne'ebe tenki prienxe kada klamar Kristaun sira nian iha momentu kontemplasaun ba mistériu-sira be Na'i Jezús nian ne'ebe besik ba Ninia-moris ikus nian iha mundu ida ne'e. Nune'e, krus no estatua-sira be iha igreja laran hafalun ho hena roxu nu'udar simbolu lutu nian.
Bainhira sarani sira hare'e krus no estatua-sira ne'ebe hafalun ho hena roxu ne'e, espera sarani fiar-na'in sira hakarak hakribi ba ninia pekadu sira hotu, arepende no unir ninia arependimentu ne'e hodi apresia liu tan ba Jezús nia terus no mate.
Sarani fiar-na'in mós tenki dada-án hosi hakarak mundu nian hodi hamoris-án ho ispíritu karidade ba malu ba ema hotu, la'os de'it ba ema-sira ne'ebe prazer iha fuan, maibé ba ema hotu, ho fó atensaun psikolojia no material ba sira ne'ebe kuran liu ema lahare'e, hanesan ne'ebe Kristu hadomi ona to'o rohan ba rohan.
TANSÁ TENKI KOR ROXU TUAN?
Kor roxu iha tradisaun Igreja simboliza arependimentu, tristeza no preokupasaun. Kor roxu mak kor lutu nian, kor hakraik-án hanesan ai-funan Violeta ne'ebe hakruk tun ba rai, no hanesan iha lalehan besik dader ne'ebe ho kor roxu-azuladu.
Ho nune'e roxu mós simboliza esperansa ba futuru, no buat ne'e mosu iha Tempu Adventu bainhira liturjia foku án hodi hein Na'i nia mai ba dala-rua. Ho nune'e mak, uza hena ho kor roxu tuan moos hodi taka falun krus no estatua-sira iha igreja.
Imajen/rilief Dalan Krus no imajen-sira Jezús nian no santu sira iha janela vidru igreja patri (karik iha) la falun tuir.
Krus ho estatua Jezús nian sei loke ninia falun bainhira Ritus Venerasaun ba Krus iha adorasaun Sesta Santa. Jeralmente bainhira ritus ne'e, hena falun krus bele troka sai kor mean raan ne'ebe simboliza sakrifísiu. Basá balu falun iha estatua-sira sei loke iha besik selebrasaun Kalan Paskua.
BELE KA KRUS NO ESTATUA EMA SANTU SIRA IHA UMA HAFALUN MÓS HO HENA ROXU?
Bele, maibé la sai obrigatoriamente. Karik hafalun krus no estatua-sira ema santu nian bele tulun ita-bot no família hodi senti liu tan Na'i Jezús nia terus, rekomenda tebes atu halo nune'e mós iha uma.
Bem-vindo à Paixão de Nosso Senhor Jesus Cristo para os leitores que a comemoram. Esperançosamente, nas próximas 2 semanas, você viverá de acordo com o amor e o sacrifício de Cristo para expiar todos os pecados humanos na cruz. Amém.
Tradutor: Sam Ribeiro
Ref:
https://www.kompasiana.com/mengapa-salib-dan-patung-ditutup-kain-ungu?
Tidak ada komentar:
Posting Komentar