KINTA-FEIRA SANTA

KINTA-FEIRA SANTA

6 ABRIL 2023

Kinta-feira Santa mak Kinta-feira iha Semana Santa, semana ida antes iha Domingu Paskua. Ne'e mak data móvel ne'ebe la'os loron feriadu jeralmemte iha Timor-Leste.

 

Iha data ne'e mós koñesidu nu'udar Kinta Endoenças, igreja rekorda iha loron ne'ebe Jezús han hamutuk ho Ninia-apóstulu sira molok Nia mate iha Sesta Santa, episódiu ida ne'ebe koñesidu nu'udar Han Hamutuk ba Dala-Ikus Nian.

Iha loron Kinta-feira Santa, durante selebrasaun Misa, mak kostume ida ba Amu hodi fase ema nain 12 nia-ain, lembra asaun hakraik-án (humildade) Jezús nian bainhira Nia rasik fase apóstulu sira nia ain iha Han Hamutuk ba Dala-Ikus Nian.

Selebrasaun fase ain, hanesan ne'ebe hanaran ensera tempu Kuaresma nian. Lembra katak Kuaresma mak tempu hosi peniténsia nian ne'ebe komesa iha Kuarta-feira Sinzas. Períodu ne'e hafanun loron sira ne'ebe Jezús la'o iha rai-fuik maran (deserto). 

Saseluk fase ain, iha loron ne'e igreja selebra sakramentu-sira Eukaristia no Ordem, ne'ebe instituidu liu-hosi Jezús nia liafuan, hanesan ne'ebe bele le'e iha Sagrada Eskritura:

Foti paun, Nia fó agradese, silu fahe no fó ba Nia eskolante sira, hodi dehan: “Ne'e mak Ha'u Isin ne'ebe sei sara-án ba mate; halo ida ne'e hodi hanoin ba Ha'u”. (Lukas 22:19).

 

Eukaristia mak sakramentu iha ne'ebe sarani simu no konsume partíkula ne'ebe halo hosi trigu, ne'ebe pasa ba asaun relijiozu nian. Hafoin asaun ne'e, sarani fiar katak partíkula ne'e sai parte hosi Jezús Kristu Nia isin.

 

Sakramentu seluk ne'e hanaran Ordem no Saxerdósiu. Bainhira Jezús husu “halo ne'e hodi hanoin ha'u”, Nia prepara hela grupu ne'e hodi selebra Eukaristia no mós atu kontinua sira nia misaun, ne'e mak misaun amu sira nian, bispu no ema-sira seluk ne'ebe treinadu ona hosi igreja.

Iha Kinta-feira Santa mós uza mina-santa ne'ebe bensa ona. Mina ne'e uza iha selebrasaun Baptismu, Krisma, nomós kose ba ema moras.

Hafoin selebra Kinta-feira Santa, Tríduu Paskal hahú, ne'ebe rekorda momentu tolu ne'ebe importante teb-tebes iha Paskua, paixaun ne'ebe signifika sofrimentu; mate no moris hias Jezús nian.

  

Semana Santa marka períodu ne'ebe hahú ho Domingu Ramus no termina ho Domingu Paskua nomós relembra momentu-sira ikus Jezús nian iha Mundu ne'e. 

Basá Kinta-feira Santa relembra Jezús Han Hamutuk ba Dala-ikus nia hamutuk ho apóstulu sira, Sexta-feira Santa hanoin-hikas Kruxifikasaun. Iha Domingu Paskua, ita selebra Kristu nia moris-hias (ressurreição de Cristo).

#SamRibeiro📝