Orasaun Ami Aman Nakonu Ho Sentidu

 

MATEUS 6:7-15

“Uainhira imi reza, keta ko'alia barak hanesan jentiu sira; sira hanoin katak ho sira nia liafuan bar-barak, Na'i sei rona sira. Keta halo hanesan sira basá imi Aman hatene buat ne'ebé kuran ba imi molok imi husu ba Nia. Ne'e duni, harohan nune'e ba: “Ami Aman, be iha lalehan, halo ami hahí-hana’i Ita naran halo Ita nia reinu to’o mai ami;

Ita nia hakaran halo tuir ba iha rai nu’udar iha lalehan. Ohin ne’e haraik ai-han lor-loron nian mai ami; haraik perdaun mai ami salan, nu’udar ami perdua ema halo a'at ami; labele husik ami monu ba tentasaun; maibé hasai ami hosi a'at. Amen.

Basá imi perdua karik ema nia salan sira, imi Aman iha lalehan mos sei perdua imi nia salan sira. Maibé imi laperdua karik ema seluk, imi nia Aman mos sei laperdua imi nia salan sira.”

Jezús hanorin mai ita orasaun ida ne'ebe interessante teb-tebes ne'e mak orasaun Ami Aman. 

Ha'u fiar ita hotu hatene ho di'ak kona-ba Orasaun Ami Aman ne'e. Maibé, iha ne'ebe sai pergunta mai ita mak, oinsá ita komprende duni ninia signifikadu no sentidu hosi orasaun ne'e rasik?

Maun-alin-feton no oan doben sira iha Kristu.

Liu-hosi orasaun ne'e Jezús hakarak hanorin mai ita lalaok ha'at (4) ne'ebe importante tebes mai ita, ne'e mak:

1. MAROMAK, ITA NAFATIN HATU'UR NIA IHA FATIN PRIMEIRU KA NÚ. 1.

Maromak ita tenki hahí, hana'i no hasantu. Jezús dehan; “Ami Aman, be iha lalehan, halo ami hahí-hana’i Ita Naran halo Ita nia reinu to’o mai ami;

Ita nia hakarak halo tuir ba iha rai nu’udar iha lalehan. ”. 

Jezús hanorin ita nune'e atu Maromak Kridor sempre sai prioridade moris ita ema nian, tanbá Nia mak ita nia huun moris nian. Ita mai hosi Nia no sei fila-fali ba Nia.

2. NU'UDAR UMANU IHA KADA MOMENTU ITA SEMPRE PRESIJA BUAT RUMA ATU MORIS.ORASAUN AMI AMAN NAKONU HO SENTIDU

Tanbá ne'e mai, ba Na'i, basá Nia mak Kriador no huun ba buat hotu-hotu. Iha Orasaun Ami Aman, Jezús dehan; “Ohin ne'e haraik ai-han lor-loron nian mai ami”. 

Jezús fiar no hatene ho lolós katak sée de'it mak mai ba Aman no husu ho fiar tomak ba Nia, nune'e nia sei hetan/simu. 

3. UMANU MAK KRIATURA SOSIAL NE'EBE SEMPRE MORIS HAMUTUK HO SIRA SELUK.

Iha relasaun sosial ho maluk sira ou ho sée de'it, parese bele de'it iha ksolok no ninia tristeza. Iha ne'ebe de'it sempre akontese má komprensaun entre ita, tanbá ne'e iha Orasaun Ami Aman, Jezús hanorin ita perdua malu no fó perdaun mós ba ita nia maluk sira. Ita husu ba Maromak atu perdua ita salan sira, depoiz de hetan tiha perdaun hosi Na'i, esperiénsia ba perdaun ne'e sai ona ita nia inspirasaun atu perdua ba maluk sira ne'ebe halo sala eh a'at hasoru ita. 

La iha ninia sentidu se ita harohan husu perdaun hosi Na'i karik ita rasik la prontu atu perdua ita nia maluk sira, tanbá ne'e iha Orasaun Ami Aman, Jezús dehan; “Haraik perdaun mai ami salan, nu’udar ami perdua ema halo a'at ami”.

4. IHA ORASAUN AMI AMAN, JEZÚS MÓS HANORIN MAI ITA ATU HUSU NA'I NIA TULUN ATU NUNE'E HADO'OK TIHA ITA HOSI DIABU NIA TENTASAUN.

Jezús hatene ho lolós, katak diabu sempre la'o lemo-lemo iha mundu ida ne'e. Umanu mak targetu tentasaun diabu nian, konxiente ba servisu diabu nian ne'e maka Jezús hanorin ba Ninia eskolante sira hodi husu tulun ba Na'i atu proteje ema ne'ebe fiar ba Nia atu nune'e labele monu ba tentasaun. 

Iha orasaun Jezús dehan; “Labele husik ami monu ba tentasaun; maibé hasai ami hosi a'at.”

Maun-alin-feton no oan doben sira iha Kristu.

Orasaun Ami Ami ne'ebe hanorin hosi Kristu mai ita, pozitivamente nakonu ho sentidu.

Mai ba ita banati tuir Nia, ho responsabilidade tomak no fahe ba maluk sira nakonu ho laran haksolok.

ORASAUN

Ami Aman, be iha lalehan, halo ami hahí-hana’i Ita naran halo Ita nia reinu to’o mai ami;

Ita nia hakarak halo tuir ba iha rai nu’udar iha lalehan.

Ohin ne’e haraik ai-han lor-loron nian mai ami;

haraik perdaun mai ami salan, nu’udar ami perdua ema halo a'at ami; labele husik ami monu ba tentasaun; maibé hasai ami hosi a'at.

Amen.