Festa Selebrasaun, Santa Virjem Maria Maromak Nia Inan
Evanjellu, Lukas 2:16-22 Haktuir kona-ba bibi-atan sira ho reflesaun badak kona-ba ha-ksolok hare'e NA'I Maksoin.
Liu-hosi Evanjellu diáriu ohin loron ne'e nian ba reflesaun Katólika domingu 01 janeiru 2023, ita mós nu'udar sarani fiar-na'in ita simu kbiit hodi imita hahalok Maria nian ne'ebe hatan ba Maromak nia servisu ho nakloke-án tomak no sinxeridade.
Saseluk ne'e liu-hosi Evanjellu refere fó hanoin mai ita oin-sá hahalok bibi-atan sira nian ne'ebe nakonu hosi ksolok hare'e NA'I maksoin iha Jezús ne'ebe moris tiha ona.
Ohin loron ne'e universalmente Igreja Katólika selebra Loron Santa Virjem Maria Maromak Nia Inan iha ne'ebe ida ne'e fó hanoin ita oin-sá ho papel Maria nian hodi halo kna'ar hanesan Inan ida ba Maksoin.
Inan Maria nia moris sai ezemplu ba ita hodi halo kna'ar ida be gloriozu. Ninia moris no ninia obediénsia mak lori mundu ne'e hetan salvasaun.
Tanba hosi ninia ezemplu, ninia sinxeridade, no ninia voluntariamente, ita ema maksalan hetan salavasaun no rekonxialiadu ho Maromak.
Tanba sá nune'e? Tanbá liu-hosi ninia ventre santo no imaculada, Maromak satisfeitu no deklara obra salvasaun nian ba umanidade.
Fó hanoin mós ita oin-sá ita responde obra real NA'I nian ba ita.
Hahalok ne'e hatudu hosi bibi-atan ne'ebe haksolok hahí no fó glória ba NA'I tanba hare'e tiha ona Maksoin.
Sira nia moris sai nakonu ho ksolok tanbá momentu ne'eba sira hare'e maksoin hosi NA'I iha Jezús Nia-Án iha prezépiu.
Naturalmente ne'e mós sai materia ba ita hanesan NA'I nia emar sira katak, ita hare'e ona maksoin hosi NA'I, maibé ninia pergunta mak oin-sá ita nia hahalok hasoru obra Maromak nian be Gloriozu ne'e?
Oin-sá resposta hosi ita nia laran no ita nia fé ba disponibilidade hosi Maria, sinxeridade hosi Jozé, no ksolok hosi bibi-atan ne'ebe aprezenta Salvador iha mundu no hare'e ona Nia?
Espera liu-hosi leitura Evanjellu ohin loron ne'e ita konsiente atu nafatin barani responde ba hahalok, ezemplu Maria nian nu'udar Maromak Nia Inan.
Ohin loron ne'e mós ita tama ona ba iha tinan 2023 no espektativa oi-oin naturalmente feita no prontu hodi hala'o.
Nune'e nu'udar ema fiar-na'in, lós duni ita agradese ba buat hotu-hotu ne'ebe ita hasoru ona durante ne'e no oras ne'e ita fila simu fali obra no ksolok hosi NA'I.
Tinan foun ne'ebe importante mak prontu, barani, no konsistente iha hahalok atu nafatin hafoun fé, hahalok, komportamentu hosi ida ne'ebe sei menus ka kuran fiar atu nafatin aumenta, komportamentu ladi'ak sai di'ak liu tan, no seluk-seluk tan.
Atu nune'e, ita presija halo mak foti hahalok prontu la'o ba oin no sai persona ida ne'ebe hafoun iha Na'i Jezús ne'ebe moris tiha ona.
Amen. (SR).
#liafuanmoris #leituradiáriu #reflesaunbadak #reflesaundiáriu #versíkulusirahosibíblia #tinanfoun2023
Tidak ada komentar:
Posting Komentar