ORASAUN MILAGROZU HOSI AMAN SANTU ANTÓNIU

 ORASAUN NOVENA BA SANTU ANTÓNIU HOSI PADUA

MILAGROZU AMAN SANTU ANTÓNIU

INTRODUSAUN:

Novena Santu Antóniu hosi Padua, ne'ebe mak koñesidu tebes ho ninia asaun milagre sira, mak santu ida hosi ordo Fransiskanu. Iha ninia moris ne'ebe badak ne'e (mate ho idade tinan 36) milagre barak tebes ne'ebe akontese tanbá ninia intersesaun. Nia ema hadomi no koñesidu nu'udar “Mahalo Milagre hosi Maromak.”

Nia koñesidu tanbá ninia obra-sira iha ema ki'ak sira lét; no bainhira nia aprende ona, nia sempre ko'alia ho liafuan-sira be simples teb-tebes maibé nakonu ho autoridade no karidade. 

INSTRUSAUN:

1. Iha Orasaun Novena ba Santu Antóniu, ita bot sira bele reza ka halo:

• Mesak 

• Ho família no 

• Ema fiar-na'in sira seluk.

2. Orasaun Novena ne'e bele halo:

•  Antes selebra loron Santu Antóniu nian.

•   Bele mós halo iha loron bai-bain sira ne'ebe ita bot sira presija tulun liu-hosi harohan da'et Santu Antóniu.

3. Loron hahú reza Orasaun Novena:

• Halo Orasaun Novena ne'e durante  loron sia (9) nia laran.

• Reza tuir oras ne'ebe ita bot rasik termina ona.

• Reza kada loron ida foti “ORASAUN LOKE” nian ezemplu iha “LORON I” nian  ho temi ita bot nia “PEDIDU” kontinua reza “ORASAUN KOLEKTA” ne'ebe prepara ona tuir mai “ORASAUN PRINSIPAL” sira hanesan: Ami Aman x1, Ave Maria x1, Gloria x3, Kredo x1 no Anju Hein Ita. “Santu Antóniu ne'ebe ema hotu hadomi ho konsideradu hosi Menino Jesus; rona-ba ami nia harohan-sira ne'e.” Ikus mak “ORASAUN TAKA” nian.

• Bele hare'e Ezemplu reza novena nian ba loron primeiru ne'ebe prepara ona.

4. Molok atu halo ka reza Orasaun Novena ne'e husu ita bot sira atu hakmatek karik senti konfortavel ona foin bele halo orasaun novena ne'e, nune'e ita bot sira bele iha vontade no konsentrasaun ba novena ne'e, hafoin ita bot sira hanoin buka sala hotu-hotu ho laran moras hodi husu perdaun ba Na'i Maromak atu fó perdua ba salan sira be ohin halo ona karik iha loron ne'e.

5. Lembra ba katak, hahú  no remata ho Sinal Krus nu'udar ita ema sarani Katóliku.

 NOVENA BA SANTU ANTÓNIU

☦Hodi Padre, Hodi Fillu, no Hodi Ispíritu Santu Sira-Naran. Amen.☦️

ORASAUN LOKE

Santu Antóniu be domin-na'in, ami respeita ita-bot nu'udar atan Maromak nian ne'ebe fiel no firme. Espera katak ami bele hetan tulun hosi ita-bot nia servisu-sira no ita-bot nia intersesaun; nune'e ami nia pedidu bele aseita hosi Maromak. Amen.

LORON I

“Rona ba ha'u lia-harohan, bainhira ha'u halerik ba Ita-bot hodi husu tulun, no foti ha'u liman ba iha Ita horik-fatin be santu” Slm 28:2

(temi ita bot nia pedidu ...)

Santu Antóniu, mahalo milagre ne'ebe mak haraik ona hosi Maromak ho abundante. Milagre barak ona mak halo hosi-Nia liu-husi ita-bot nia intersesaun  Iha ita-bot nia di'ak, mai-ba agora atu tulun ami no rona ami nia pedidu ida ne'e. Amen.

LORON II

“Keta hasubar Ita-oin mai ha'u, keta rejeita Ita-atan ida ne'e ho hirus; Ita-bot mak ha'u nia tulun, keta so'e ha'u no keta husik ha'u, oh Maromak ha'u nia salvador” Slm 27:9

(temi ita bot nia pedidu ...)

Santu Antóniu be domin-na'in, ami hakbesik ba ita-bot ho konfiansa tomak ba Maromak nia magnanimidade ne'ebe iha ba ita-bot; ne'ebe sempre prontu atu tulun sira ne'ebe presija.

Ita-bot ne'ebe iha lalehan nia glória, sai ba ami nia ajenti. Amen.

LORON III

“Ita-bot di'ak, oh Na'i, no gosta perdua, ema ne'ebe harohan nafatin ba Ita-bot, Ita-hadomi ho domin ne'ebe naresin.” Slm 86:5

 (temi ita bot nia pedidu ...)

Santu Antóniu be gloriozu, ami hato'o ami nia frakeza no ami nia pekadu-sira hasoru Ida ne'ebe onipotente. Maske ami la merese, tulun ba ami iha ami nia nesesidade ne'ebe urjenti. 

Amen.

LORON IV

“Dader-dader fó hanoin mai ha'u ba Ita-domin, basá ba-Ita mak ha'u tau fiar.. Hatudu mai ha'u dalan ne'ebe mak ha'u tenki luta, basá ba-Ita mak ha'u harohan ba.” Slm 143:8

(temi ita bot nia pedidu ...)

Santu Antóniu ne'ebe badinas fó tulun, tulun ba ami atu bele komprende no konsidera Maromak nia intensaun-sira iha ami nia moris. Sai ba ami nia patronu ne'ebe autorizadu iha ami nia nesesidade ne'e. Ami konfia ita-bot sei harohan husu Maromak nia mezerikódia tan ami ne'ebe presija. Amen.

LORON V

“Ema ne'ebe koñese Ita-naran fiar ba-Ita, basá Ita la husik hela ema ne'ebe buka Ita-bot, oh NA'I” Slm 9:10

(temi ita bot nia pedidu ...)

Santu Antóniu ne'ebe moos, tan Ita nia domin ba Kristu no Nia-Igreja, ami husu Ita tulun ba ami ne'ebe iha hela preokupasaun nia laran ne'e. Ami husu resposta. Hatudu Maromak nia autoridade iha Nia ema santu-sira ho fó tulun Nia-povu. Amen.

LORON VI

“NA'I mak ha'u nia forsa no ha'u nia helik-fatin; ba-Nia ha'u fuan tau fiar. Ha'u hetan tulun tanbá ha'u laran haksolok, no ho ha'u knananuk ha'u agradese ba-Nia” Slm 28:7

(temi ita bot nia pedidu ...)

Santo Antóniu be laran luak, entrega ita-bot ba pobreza hariku Igreja ho bénsaun barak. Ami husu ita-bot nia tulun, nune'e tanbá ita-bot nia ezemplu ne'e, fó ami grasa laran luak atu simu Maromak nia hakarak. Amen.

LORON VII

“Maske ha'u la'o iha rai-klean nakukun ha'u sei la-ta'uk buat a'at ida, tan Ita hamutuk ho ha'u; Ita nia ai-tonka no ai-tato'an, ne'e mak fó ksolok mai ha'u.” Slm 23:4

(temi ita bot nia pedidu ...)

Santu Antóniu ne'ebe di'ak, ita-bot fó ksolok ba sira, ne'ebe hanesan ami iha tristeza nia laran. Halibur hamutuk ho ami, ne'ebe banati ita-bot, hakarak fó ksolok ba sira ne'ebe iha difikuldade nia laran. Husu Maromak nia tulun mai ami. Amen. 

LORON VIII

“NA'I, Ita rona ema laran luak sira no haforsa sira fuan.” Slm 10:17

(temi ita bot nia pedidu ...)

Santu Antóniu ne'ebe hetan ona bénsaun. Ita-bot nia moris hanesan ezemplu be furak ne'ebe halo ona milagre oi-oin ba sira ne'ebe presija teb-tebes. Hosi ita horik-fatin iha lalehan, mai ba. Tulun ba ami, husu ba Maromak nia resposta ba ami nia nesesidade ne'e. Amen.

LORON IX

“Ita-bot di'ak, oh Na'i, no gosta perdua, ema ne'ebe harohan nafatin ba Ita-bot     Ita-hadomi ho domin ne'ebe naresin.” Slm 86:5

(temi ita bot nia pedidu ...)

Santu Antóniu ne'ebe fiel, ami fuan nakonu ho sentimentu agradese. Ami hatene katak ita-bot nia autoridade tanbá Maromak mak bot, no ami hatene mós katak ita-bot sei hetan hosi-Nia sáida mak ami hein. Tulun ba ami agora; ami mós husu atu ami bele serví Maromak hanesan ita-bot halo ona. Amen.

Santu Antóniu ne'ebe ema hotu hadomi ho konsideradu hosi Menino Jesus; rona-ba ami nia harohan-sira ne'e.

ORASAUN TAKA

Oh Maromak, ami husu atu ami nia onra ba Santu Antóniu sai hún ksolok nian ba Ita-Kreda. Nu'u ninia tulun halo ami forsa liu-tan iha ami nia fé. 

Nu'u mós ninia tulun halo ami bele hetan premiu ne'ebe rohan-laek. Ami husu ne'e ho Intersesaun Jezús Kristu, ami Na'i. Amen.

☦Iha Aman, iha Oan-Mane no iha Ispíritu Santu Sira-naran...Amen.☦

______________________________________________

Traduz no hakerek hosi: Sam Ribeiro

Vizita Ami Kanal Media Sosial-Sira Seluk:

https://www.facebook.com/biora.21/

https://www.instagram.com/biora.21/

https://youtube.com/channel/UC6lxMLtpCmrD74AJGGekUHw

https://chat.whatsapp.com/F0kVVVXGaPSJekdl4yKdPr (+670 74433937/+670 75637052)

______________________________________________

EZEMPLU||

ORASAUN NOVENA BA SANTU ANTÓNIU HOSI PADUA

SINAL KRUS

☦Hodi Padre, Hodi Fillu, no Hodi Ispíritu Santu Sira-Naran. Amen.☦️

ORASAUN LOKE

Santu Antóniu be domin-na'in, ami respeita ita-bot nu'udar atan Maromak nian ne'ebe fiel no firme. Espera katak ami bele hetan tulun hosi ita-bot nia servisu-sira no ita-bot nia intersesaun; nune'e ami nia pedidu bele aseita hosi Maromak. Amen.

LORON I

“Rona ba ha'u lia-harohan, bainhira ha'u halerik ba Ita-bot hodi husu tulun, no foti ha'u liman ba iha Ita horik-fatin be santu” Slm 28:2

 (temi ita bot nia pedidu ...)

Santu Antóniu, mahalo milagre be haraik ona hosi Maromak ho abundante. Milagre barak ona mak halo hosi-Nia liu-husi ita-bot nia intersesaun iha ita-bot nia di'ak, mai-ba agora atu tulun ami no rona ami nia pedidu ida ne'e. Amen.

ORASAUN KOLEKTA

Orasaun ba Santu Antóniu hosi Padua

Gloriozu Santu Antóniu! Ami fó honra ba Ita bo'ot nu’udar Na’i Maromak nia atan, ne'ebé fiel no badinas. Liu hosi Ita bo'ot nia harohan, Na’i Maromak halo ona milagre oi-oin iha povu nia le’et. Iha moris tomak, Ita laran metin ba Maromak Nia providênsia, hodi tulun ema ki’ik no ki'ak sira ho domin. Ami hakbesik ba Ita futar oin ho esperansa ne'ebé bo'ot tebes, basá, rekoñese grasa wain lalehan nian ne'ebé mak existe iha Ita bo'ot.  Ami fiar katak, Ita bo'ot sei harohan mai ami, husu tulun lalehan nian ba ami nia intensaun ida ne’e; 

(temi intensaun ruma...). 

Santu Antóniu Aman di'ak! Liu hosi ami nia orasaun ne'ebé folin laek no ami nia sakrefisiu loro-loron, ami hakarak oferese ba Aman Maromak hodi husu tulun ba ami nia intensaun ida ne’e. Santu Antóniu, ami agradese tanbá Ita hanorin ona ami atu moris iha ksolok laran, maski iha difikuldade oi-oin ne’ebé mak ami hasoru iha ami-nia moris.  Santu Antóniu, Obrigadu ba ita nia harohan. Haraik Ita-nia bensaun mai ami nafatin no ba ema sira hotu iha komunidade ne'e no mundu ida ne’e. Amen.

“Rona ba ha'u lia-harohan, bainhira ha'u halerik ba Ita-bot hodi husu tulun, no foti ha'u liman ba iha Ita horik-fatin be santu” Slm 28:2

Oh Maromak, ami husu atu ami nia onra ba Santu Antóniu sai fonte ksolok nian ba Ita Bo'ot nia Kreda. Nune'e Ni-nia tulun halo ami forsa liu tan iha ami nia fiar. Nune'e mos ni-nia harohan ne'e halo ami hetan grasa ne'ebé eternal. Ami husu ne'e ho intersesaun Jezus Kristu ami Na'i. Amen. 

ORASAUN AMI AMAN

Ami Aman, be iha lalehan, halo ami hahí-hana’i Ita naran halo Ita nia reinu to’o mai ami; Ita nia hakarak halo tuir ba iha rai nu’udar iha lalehan. Ohin ne’e haraik ai-han lor-loron nian mai ami; haraik perdaun mai ami salan, nu’udar ami perdua ema halo a'at ami; labele husik ami monu ba tentasaun; maibé hasai ami hosi a'at. Amen.

ORASAUN AVE MARIA

Ave Maria Grasa Barak Liu Iha Ita Bo'ot, Maromak Ho Ita Bo'ot, Ita Bo'ot Di'ak Liu Feto Hotu-Hotu, Ita Bo'ot Nia Oan Jesus Di'ak Liu.

Santa Maria Maromak Inan Harohan Ba Na'i Maromak, Tan Ami Ata Nia Salan, Oras Ne'e No Oras Ne'ebé Ami Ata Besik Atu Mate. Amen.

ORASAUN GLÓRIA 

Glória ba Aman, ba Oan no ba Espíritu Santu. Nu'udar hori uluk oras ne'e tinan ba tinan nafatin. x3

ORASAUN KREDO (orasaun fiar nian)

Ha’u fiar Maromak mesak ida de’it, Aman Kbi'it-tomak Na’in, Mahalo lalehan no rai, buat hotu ne'ebé bele hare'e no labele hare'e. Ha’u fiar Na’i ida de’it, Jezus Kristu, Maromak Oan-mane Mesak, moris nanis hosi Aman molok tempo hahú. Maromak hosi Maromak, Naroman hosi Naroman. Maromak lo'os, hosi Maromak lo-lo'os; Aman hako’us, la halo Nia, nia-An ida de’it ho Aman. Buat hotu halo ona hodi Nia.  Tan ita ema, atu soi ita, Nia tun ona hosi Lalehan. Hodi Espirítu Santu, Nia hola isin iha Virjen Maria nia knotak, halo nia-An ba ema. Tan mos ba ita, ema hedi Nia ba Kruz, iha Pónxiu Pilatus nia ukun; terus, mate tiha, ema hakoi Nia. Liu loron tolu, tuir Escritura, Nia hahú moris-hi’as; hi’it-An ba Lalehan, he’in-An iha Aman nia sorin kwana. Nia sei mai fali ho glória, atu tesi-lia ba ema moris no ba ema mate; nia ukun sei rohan-laek. Ha’u fiar Espirítu Santu, Na’i be haraik moris, mai hosi Aman no Oan; ema haNa’i, haliban hamutuk ho Aman no Oan: Nia ha’e lia tun liu hosi Profeta sira. Ha’u fiar Kreda ida-mesak, Santa, Katólika,Apostólika. Ha’u haklaken baptismu ida de’it atu kasu salan. Ha’u hein moris-hi’as hosi mate siran, no moris ida be sei mai. Amen.

ORASUN BA ANJU HEIN ITA

Na'i Maromak nia Anju Santu hein di-di'ak ha'u ata, ukun ha'u nafatin halo ha'u tuir diak deit tanbá Na'i Maromak rasik mak entrega ha'u, iha ita bo'ot nia liman. Amen. 

ORASAUN TAKA

 Oh Maromak, ami husu atu ami nia onra ba Santu Antóniu sai hún ksolok nian ba Ita-Kreda. Nu'u ninia tulun halo ami forsa liu-tan iha ami nia fé. 

Nu'u mós ninia tulun halo ami bele hetan premiu ne'ebe rohan-laek. Ami husu ne'e ho Intersesaun Jezús Kristu, ami Na'i. Amen.

Santu Antóniu ne'ebe ema hotu hadomi ho konsideradu hosi Menino Jesus; rona-ba ami nia harohan-sira ne'e.

Santu Antóniu, harohan mai ne'ebe husu ita-bot nia tulun.

☦Iha Aman, iha Oan-Mane no iha Ispíritu Santu Sira-naran...Amen.☦

Prepara hosi:

Samuel Paulo Ribeiro